للتسجيل بالمنتدي بالتسجيل



 
الرئيسيةبحـثالتسجيلدخول

شاطر | 
 

 مركوب أبوالقاسم: مقاله اسعاد يونس

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
AvaMakar
نائب المدير
نائب المدير


ذكر
السرطان النمر
عدد الرسائل : 4726
الكنيسة : القديس أنبا مقار
العمل : Administration
الشفيع : القديس أنبا مقار
تاريخ التسجيل : 05/01/2010
نقاط : 14003
التقييم : 1

مُساهمةموضوع: مركوب أبوالقاسم: مقاله اسعاد يونس   السبت 25 ديسمبر 2010, 10:04 pm

مركوب أبوالقاسم: مقاله اسعاد يونس



بقلم إسعاد يونس ٢٤/ ١٢/ ٢٠١٠
■ فاضل أسبوع يا جدعان ونبتدى السنة الجديدة.. كل سنة وانتو طيبين..
حبايبنا الحلوين القمامير واخدين بالهم إننا بقالنا عشر سنين فى الألفية
التالتة ولّا الساعة لسه مأخرة نص قرن معاهم؟؟.. عاملين أيتها استراتيجية
للسنة اللى جاية دى على الأقل ولّا يا دار ما دخلك شر.. ونينى نينى لما
ييجى الاهبل يشترينى.. ويا طالب السمنة من دهن النملة كفاك شر أكل
المفروكة؟؟.. ومطرح ما ترسى حاندقلها.. وزرعت شجرة لو كان وسقيتها بمية
ياريت طرحت ما يجيش منه؟؟..
■ يا ترى يا عمر أفندى وإنت بتنشىء سلسلة محلاتك كنت عارف اللى حايجرى
فيها؟؟.. وهما بيأمموك حد إدالك أى وعود بالمحافظة على استثمارك اللى
اتلهف منك ده؟؟.. لو كنت عايش دلوقتى كنت حاتحس بإيه؟؟
■ الحنش ظهر تانى فى صفقة عمر أفندى.. بيقولوا قدم عرض للشراء مع عرضين
آخرين.. مين أصحاب العرضين؟؟.. بيقولوا لبنانيين.. وماحدش عارف عروضهم
بكام.. إنما الحاج الحنش عرضه مكتوب بالبنط العريض فى الجرايد.. ووعود
براقة يسيل لها اللعاب.. وبيقولوا إن عرضه أفضل العروض وأكثرها وضوحا.. طب
والناس التانية دى ماحدش لا عارفهم ولا عارف عروضهم ولا حتى أساميهم..
إشمعنى يعنى؟؟.. وبيقولك مستعد يشيل الليلة ورقبته سدادة بس على شرط.. مش
حايفصح عن القيمة النهائية للصفقة.. ولا حتى لويكيليكس.. إلا فى الآخر
خالص.. آخر إيه؟ مش عارفين.. يمكن مع انتهاء شهر رمضان.. عشان كلنا نشترك
فى حل الفزورة.. يا رب فوازيره تطلع أسهل من فوازير ميريام فارس.. بس
الأكادة هو مش أحلى.. كنت فين يا هانش لما اصطبحت أنا بالوش؟؟.. طب مفيش
جايزة؟؟.. جوز بطاطين ومخدتين بوليستر كده ولّا حاجة؟؟..
■ بس الأكادة بقى إن مصدر بالشركة القومية للتشييد بيبدى مخاوفه من أخونا
الحنش.. ما هو له قرصة قبل كده لما قعد يرمى الملايين فى التليفون من
السعودية وهو طالع على الهوا فى برنامج تليفزيونى وكأنه داخل مزاد نقلة
سمك أو بيشترى حِمل برسيم من على ضهر الحمار.. وعليا مش عارف بكام مليون..
وكاش مونى أبعتهم عالمطار توك فى شنط.. بس قولوا آه.
■ إيه اللى جاب سيرة مركوب أبوالقاسم دلوقتى؟!
■ سبحان الله.. حدش عارف سلاسل المحلات الشبيهة بتستثمر فى مصر وتنشئ
مواقع على أعلى مستوى زى كارفور وغيره ما بتقربش ليه على عمر أفندى ده؟..
وأنا عيلة صغيرة رحت ألمانيا مع أهلى.. وخدونا الألمان يفرجونا على الصرح
الحضارى اللى اسمه الكاوف هوف.. قاموا أهلى قعدوا يتريقوا ويقولوا للألمان
إحنا عندنا سلاسل شبيهة بس أقدم وأعظم.. عندنا عمر أفندى وشيكوريل
واللاذى منه.. شوف الدنيا راحت فين وجت منين؟؟.. المولات عمالة تفتح
وسلاسل المحلات دى تكتر وتتوسع وتنجح.. وإحنا قاعدين نتأمز تأميز.. زى
اسمه إيه ده اللى بياكل جميز.
■ تدخل لندن وأول ما فى نيتك تزور.. هارودز.. صرح حضارى ومكان رائع..
أتذكر جيدا إن زى الأيام دى كان هارودز يعمل أوكازيون بمناسبة الأعياد
المجيدة.. فالأمريكان يكونوا عاملين رحلات منظمة وحاجزين من السنة اللى
قبلها.. والسياحة تنشط فى البلد بشكل جنونى.. والإنجليز يمتنعوا عشان
يتركوا فرصة للسياح.. وتصبح يوم الكريسماس الصبح تلاقى ولا ربع مليون نسمة
بايتين فى الشارع أما أبواب هارودز.. مزودين بأدوات البيات فى الشارع
والطعام والملابس الثقيلة وكله.. طقس سياحى له خاصية وطعم.. بيقعدوا سنة
كاملة يستعدوا له.. والشوارع متأمنة ومقفولة وممنوع سير المركبات.. حدث
سنوى سياحى تسويقى، ضاخ للعملة، منشط للدورة الدموية اللندنية، باعث على
دفء الجيوب، رغم التلج اللى كاسى البلاد.. مش زى مهرجانات التسوق بتاعتنا
اللى بنبيع فيها بليلة وبستلات وقروانات بلاستيك وملابس أختى البريونية
المحجبة؟؟.. الساعة الثامنة صباحا تفتح الأبواب ليتدفق هذا الجمع الرهيب
بنظام عجيب داخلين المكان.. واشترى كل شىء إيدك تطوله وأخرج م المكان يا
مواطن يا أمريكى.. عشان تلاقى هارودز ده أنضف م الصينى بعد غسيله.. زى
الفل من كله.. لم يتركوا وراءهم أى هردبيسة ولا قذارة ولا ورق تواليت
وبامبرز متعبية ومرمية ورا الريونات.. ولا بضاعة.. يعنى تصفيات بضائع
شريفة عفيفة مثمرة مربحة.. ودورة رأس مال تتجدد فى ساعات.. وبضاعة جديدة
نوفى تحتل كل شبر فى أقل من أربعة وعشرين ساعة.
■ عندما باع المصرى محمد الفايد المحلات للقطريين.. لم تحدث أى زومبوليطة
فى الصالون.. عادى جدا.. الفايد اللى تعب وأنشأ وصنع السمعة.. وهو اللى
عمل رواق لمصر ودرز المكان بالتماثيل المصرية وذكر الناس فى كل خطوة
بمصر.. وهو اللى حرص وشدد على عدم تغيير هوية المكان وأكد على الحفاظ على
نفس المستوى.. والقطريين والشهادة لله لم يمسوا أى معلم من المعالم
المميزة لهارودز.. بل يتوقع أن يضيفوا إليه محسنات للطعم ومكسبات للرائحة.
■ مين بقى اللى اتلوى واتعوج واتأمِّز برضه؟؟.. إحنا.. بدون أى مناسبة كده.
■ إنما حظرتنا.. وعمر أفندى.. يا جدعان والله ما جبت سيرة مركوب أبوالقاسم.
■ من ضمن الإحصائيات التى تظهر فى آخر كل عام.. ظهرت إحصائية تقول إن
المصريين حصلوا على ٤٦٥ ألف فتوى من دار الإفتاء ما بين مكتوبة وتليفونية
وشفهية وإنترنتية خلال عام ٢٠١٠.. فيا ترى يا هل ترى كم فِتية خرجت من غير
دار الإفتاء؟؟.. وهل ممكن رصد نوعيات هذه الفتايا؟؟.. حد بيتابع الكلام
ده يا جماعة؟؟.
■ فيه مواطن اسمه مجدى ويليام.. يحمل بطاقة شخصية ذات رقم قومى طويل
وصورة وبيانات.. لديه موضوع مع البابا شنودة والكنيسة، يخص السماح له
بالزواج الثانى.. هذا الموضوع ظل لفترة يثير جدلا واسعا على صفحات الجرائد
ويحتل ساعات من البث التليفزيونى.. ولكن.. ولا مرة واحدة تم فيها ذكر اسم
الرجل إلا والتصقت به صفته بأنه الزوج السابق للفنانة هالة صدقى.. مالوش
صفة تانية؟؟.. ما ينفعش نجيب سيرته إلا مشفوع بهذا اللقب؟؟.. الست دى
اطلقت منه.. واتجوزت رجل فاضل تحمل الآن اسمه.. وأنجبت منه أطفالاً..
وتعيش فى بيتها آمنة مستقرة بعيدة تماما عن كل هذه الهرتلة.. مش عيب؟؟.
مافيش ولا واحد فكّر شوية وهو بيكتب المانشيت فى الجرايد وفرحان قوى إنه
حاصل على خبر أو سبق إن ده عيب؟؟.. مافيش أى ذوق وكياسة وأدب فى حق الراجل
اللى الست دى اتجوزته؟؟.. هو إحنا مابقاش عندنا دم ليه كده؟!





ياريت نضغط علي الثلاثة اشكال دول في اعلي المواضيع وفي الصفحة الرئيسية و كل صفحة في المنتدي
وعل فكرة دول موجودين في اعلي شمال الصفحة .....

الرجوع الى أعلى الصفحة اذهب الى الأسفل
 
مركوب أبوالقاسم: مقاله اسعاد يونس
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: المنتديات المسيحية :: الاخبار المسيحية والعامة-
انتقل الى: